Poesie di Sebastiano Satta. In limba da Nuoro

Messa in voce di Tonino Mesina

Ritratto di Graziano Secchi

###

01 - S’abbocau

Si faveddo, faveddo chi' resone
su dialu dò su santu e avvocaeddos!
A Bovore connau pro duos porcheddos
che l'han fattu finire i' recrusione.

Pica a Bustianu Satta... sos cherbeddos
chi li sartien a balla, mammuthone...
juchet sa' cara manna che bajone
e si tropedit nande duos faveddos.

E gai! semper mi serbo 'e Bellingherra.
Iah est beru ch'est carittu, ma no crettas
chi unu menzus nd'accattes i' sa terra.

Cussu jà est abboccau! es sa pandera!
chin d'una difesedda e tres brullettas
ti nch'istrazzat su ladru da-e galera.

###

02 - Santa Maria

Santa Maria ja est bella a Pasca 'e aprile,
cando torran sas runchines dae mare;
toccos de gloria e gridos d'allegria
in cada nidu e in cada campanile.

Ma prus bella est a bider dae su jannile
sas feminas issinde tott'impare,
artas e bellas, a passu signorile,
chi paren santas foras de s'artare.

Santas chi riden, santas ch'in zarmìnos
in bucca; e chie las amat forte
dant sas grassias e sanant sos dolores.

Nè a tue, pro chi malos happas ustinos,
t'hana a mancare a cada mala sorte
custos coros, Sardigna, e custos frores.

###

03 - Su battizzu

Compare, barbi fattu che un isposu,
colat a inghiriu chin sa carraffìna;
a sos pizzinnos dat su maricosu
e a comare caffè de coraddina.

Iffora, in sa cortitta, ziu Cambosu
li pesat una boche; in sa cuchina
zaiu cuntentu, in mesu a sa chisina
s'est tottu isterriu che cane runzosu.

E a su pizzinnu tottus sa fortuna
leghene in sas istellas e in su binu
e li cantana a inghiriu sa cantone.

Ma Antoni, ch'ind'hat bibiu prus de una,
narat chi tottus han zirau su tinu,
ca su pizzinnu finit in presone.

###

04 - Sa ferrovia

Mesupezza ch'es tottu mandronìa
fiti, a s'abesu suo, corcau ziccande;
e hat nau cand'hat bidu chi fruschiande
ch'est iserghia biacue sa ferrovìa:

- Compa', gai Deus m'assistat, si credìa
chi si poderet goi currer bolande,
pro chi custu ingrediente, s'est andande,
la fachet finzas a s'acchettu 'e zia!

Su malu est chin che piccat tottu cantu:
su binu, chin sa preda, chin sa tàula,
e non nos lassat prusu ite carrare.

E compare: - No est cussu s'ispantu,
s'ispantu, naro, ch'est chi cussa diàula
non si lassat dae nemmos irrobare!

###

05 - A Piera

Piera, non ti mustres tantu avara
de amore e surrisos delicados
chin custu coro meu, chi ti prepara
basos e carignos mai provados.

Iscurta, bella, iscurta, rosa rara,
iscurta sos piantos infiammados
chi notte e die pro te, columba cara,
m'essin dae sos ojos disdizzados.

Pache, columba mea, pache, tesoro,
istella mattutina de s'oriente
chi costante mi brillas in su coro.

Semus unidos in unu destinu:
e dego aspetto cuss'istante ardente
chi amus a dormire sinu a sinu.

Poesie di Sebastiano Satta. In limba da Nuoro

Poesia & Poesia

Dove puoi ascoltare?

Episodi